Проектот TRANSIT во кој учествуваат Универзитетот „Св. Кирил и Методиј“ во Скопје, Факултет за електротехника и информациски технологии и ЕВН Македонија организира натпревари поврзани со искористувањето на енергија од обновливи извори и транзиција кон одржлив развој во три категории:
- Најдобар детски цртеж за деца од основни училишта (7 – 11 години);
- Најдобар магистерски труд;
- Претпријатие/стопанско здружение кое дало најголем придонес кон одржливоста и искористувањето на обновливи извори на енергија.
Повеќе информации за проектот се достапни на веб страната овде.
Натпреварот е отворен од 20.12.2024 година до 10.02.2025 година.
Најдобар детски цртеж
Учесниците (основни училишта) се поканети да го пополнат приложениот формулар за учесници. Родителите на учениците кои ќе учествуваат на натпреварот ќе треба да потпишат формулар за согласност. Пополнетите формулар за учесници, формулари за согласност и цртежи во електронска форма се испраќаат на адреса: nagradi-transit@pees-feit.edu.mk од страна на наставник/претставник на училиштето.
Најдобриот цртеж на тема искористување обновливи извори на енергија/одржливост ќе биде награден на државно ниво со TRANSIT трофеј, парична награда од 300 евра за институцијата и соодветен подарок за детето. Победникот на државно ниво ќе биде дел од натпреварување на европско/меѓународно ниво. Меѓународните награди вклучуваат трофеј и парична награда од 1000 евра за институцијата и подарок за детето.
Најдобар магистерски труд
Студентите кои завршиле втор степен на студии во учебната 2023/2024 година, во областите на транзиција кон одржлив развој и/или обновливи извори на енергија се покануваат да учествуваат во натпревар за најдобар магистерски труд. Учесниците се поканети да го пополнат формуларот, каде ќе имаат можност на кратко да ја претстават својата работа и главните заклучоци на магистерскиот труд. Формуларот треба да се испрати на адреса nagradi-transit@pees-feit.edu.mk.
Најдобриот труд, според критериумите на иновативност, оригиналност, влијание и достигнување, ќе биде награден на државно ниво со TRANSIT трофеј и парична награда од 300 евра. Покрај тоа, победникот ќе земе учество на натпреварувањето на меѓународно/европско ниво, каде се доделува парична награда од 1000 евра.
Натпревар за претпријатија/стопански здруженија
Се покануваат претпријатија или стопански здруженија кои во изминатите 12 месеци значително придонеле кон одржливиот развој и производството или искористувањето на обновливите извори на енергија да го пополнат формуларот и да го испратат на адреса nagradi-transit@pees-feit.edu.mk. Во формуларот има можност, на кратко, да се претстави работата и придонесот на претпријатието/здружението. Критериумите за избор се:
- Обемот на работа и посветеност за распространување на идејата за искористувањето на обновливите извори на енергија и/или обука на вработените во врска со транзицијата кон одржлив начин на живот/кариера и/или поддршка на локалните заедници за усвојување на одржливи практики;
- Влијанието на постигнатите резултати во распространувањето на идејата и знаењата за искористувањето и транзицијата кон обновливи извори на енергија на крајните корисници; и
- Грижата за родовата еднаквост на учесникот во натпреварот.
Најуспешното претпријатие/здружение на натпреварот на државно ниво ќе биде наградено со TRANSIT трофеј и понатамошно учество на меѓународно/европско ниво.
Формуларите се на англиски јазик поради меѓународниот карактер на проектот. Апликациите ќе бидат оценувани од Комисија за спроведување на натпреварите, која е составена од по еден член од сите европски земји кои учествуваат во проектот.
