ФЕИТ потпиша Меморандум за соработка со Државното училиште за рехабилитација на деца и младинци со оштетен вид „Димитар Влахов“ – Скопје со кој се утврдува рамката во која се реализира соработката помеѓу двете институции за спроведување истражувачки, образовни и апликативни активности и проекти од заеднички интерес, заснована врз искористување на научно-стручните, професионалните, материјално-техничките и на просторните капацитети на потписниците. Меморандумот го потпишаа Александра Јаковчевска, Директор на Училиштето, и проф. д-р Владимир Атанасовски, Декан на ФЕИТ.
Предмет на соработката е развојот на современи асистивни технологии за учениците со оштетен вид преку примена на електротехниката и на информациските технологии, со цел да им се овозможи подобар пристап до образование и нови можности. Соработката вклучува и организирање заеднички работилници, семинари и обуки за студенти, истражувачи и за професионалци.
Во рамките на средбата, Кристијан Лазарев, професор по македонски јазик, ги претстави потребите за дизајн и реализација на нови решенија за предизвиците со кои се соочува Училиштето, а во кои би можел да помогне Факултетот. Проф. д-р Бранислав Геразов пак, зборуваше за досегашните резултати постигнати од студентите на ФЕИТ во областа на асистивните технологии, задржувајќи се на говорните технологии и изработката на гласот за синтеза на говор на македонски Сузе.
