Проектот TRANSIT во кој учествуваат Универзитетот „Св. Кирил и Методиј“ во Скопје, Факултет за електротехника и информациски технологии и ЕВН Македонија организира натпревари поврзани со искористувањето на енергија од обновливи извори и транзиција кон одржлив развој во три категории:
- Најдобар детски цртеж за деца од основни училишта (7 – 11 години);
- Најдобар магистерски труд;
- Претпријатие/стопанско здружение кое дало најголем придонес кон одржливоста и искористувањето на обновливи извори на енергија.
Повеќе информации за проектот се достапни на веб страната овде.
На 19.03.2025 г. одржан е состанок на комисијата за доделување на наградите на проектот TRANSIT која се состои од учесници во проектот. Добитници на наградите се:
Најдобар детски цртеж
Добитник на наградата (1. место) е ученикот Лука Вељановски од ООУ „Кирил Пејчиновиќ“ – Скопје.
Поради големиот интерес за натпреварот, се прогласуваат уште 4 дополнителни добитници на пофалница (дадени по азбучен ред):
- Иларија Марковска – ООУ „Крсте Петков Мисирков“ – Куманово
- Дион Махмути – ООУ „25ти Мај“ – Скопје
- Мила Талевска – ООУ „Коле Канински“ – Битола
- Саше Ќамилов – ООУ „Кирил и Методиј“ – Стојаково, Богданци
Критериуми за оценувањето на цртежите се оригиналност на идејата на цртежот од аспект на искористувањето на обновливи извори на енергија, техниката и квалитетот на изработка на цртежот и возраста на авторот.
Најдобриот цртеж на тема искористување обновливи извори на енергија/одржливост е награден на државно ниво со TRANSIT трофеј, парична награда од 300 евра за институцијата и соодветен подарок за детето. Победникот на државно ниво ќе биде дел од натпреварување на европско/меѓународно ниво. Меѓународните награди вклучуваат трофеј и парична награда од 1000 евра за институцијата и подарок за детето.
Најдобар магистерски труд
Добитник на наградата е м-р Александар Чавлески, кој магистрирал на тема „Фотоволтаичен систем за електричен погон на пловечки објекти“ под менторство на проф. д-р Димитар Димитров, на Факултетот за електротехника и информациски технологии, при Универзитетот „Св. Кирил и Методиј“ во Скопје.
Најдобриот магистерски труд, според критериумите на иновативност, оригиналност, влијание и достигнување, е награден на државно ниво со TRANSIT трофеј и парична награда од 300 евра. Покрај тоа, победникот ќе земе учество на натпреварувањето на меѓународно/европско ниво, каде се доделува парична награда од 1000 евра.
Натпревар за претпријатија/стопански здруженија
Добитник на наградата е Македонското здружение за енергија од обновливи извори (МАРЕС) кое во изминатите 12 месеци значително придонело кон одржливиот развој и производство/искористување на обновливите извори на енергија.
Критериумите за избор се:
- Обемот на работа и посветеност за распространување на идејата за искористувањето на обновливите извори на енергија и/или обука на вработените во врска со транзицијата кон одржлив начин на живот/кариера и/или поддршка на локалните заедници за усвојување на одржливи практики;
- Влијанието на постигнатите резултати во распространувањето на идејата и знаењата за искористувањето и транзицијата кон обновливи извори на енергија на крајните корисници;
- Грижата за родовата еднаквост на учесникот во натпреварот.
Најуспешното претпријатие/здружение на натпреварот на државно ниво е наградено со TRANSIT трофеј и понатамошно учество на меѓународно/европско ниво.
