Енергетска електроника (18-ЕНЕЛ)

Студиска програма: 18- Енергетска електроника (18-ЕНЕЛ)

Траење: 1 година

Број на ЕКТС кредити: 60 ЕКТС

Услови за запишување: Завршен прв циклус студии (академски) на сродни студиски програми во земјата и во странство.

Академски назив: Магистер по електротехника и информациски технологии од областа енергетска електроника

Енергетската електроника е подрачје на електротехниката кое доживеа интензивен технолошки развој во изминатите четири децении, а во последните години, со се поголемото значење на обновливите извори на енергија, како и енергетски ефикасното користење на електричната енергија, израсна во голема и особено важна научно-техничка дисциплина.

Енергетската електроника се занимава со конверзија и управување на електричната енергија во голем број на апликации во: постројките на тешката индустрија, електродистрибуцијата, обновливите извори на енергија, белата техника, телекомуникациите и компјутерската техника, авионската и воената индустрија и друго. Како примери на системи во кои енергетската електроника наоѓа примена може да се наведат еднонасочните и наизменичните извори за напојување, регулаторите за осветлување и затоплување, електричното заварување, електрохемиските процеси, индуктивното загревање и топење, корекција на факторот на моќност и отстранувањето на пречките во електричната мрежа, управувањето на машини на еднонасочен и наизменичен напон, трансформирањето на енергијата од батериите, сончевите, ветрогенераторите и другите обновливи алтернативни извори на енергија, изворите на непрекинато напојување со енергија на компјутери и други електрични системи и друго.

Значењето на енергетската електроника може да се илустрира со фактот дека во развиените земји околу 60% од генерираната електрична енергија се консумира од електричните машини, а наредните 20 % од осветлување. И кај двете примени со воведување на енергетска електроника може да се постигне поголема енергетска ефикасност и подобрено управување. Уште повеќе, постои општа потреба за претворање на електричната енергија од форма присутна во електричната мрежа во алтернативни форми потребни за разни апликации (на пример за напојување на електронските уреди и системи е потребна еднонасочна енергија). Во моментот, околу една третина од целата електрична енергија се преобразува пред нејзината конечна примена, а се предвидува дека овој дел ќе стане поголем од половина во наредните 5 години.