Факултетот за електротехника и информациски технологии (ФЕИТ) организира тематска школа „Зимска школа за е-здравје и паметни уреди и технологии“, во рамки на европскиот проект WideHealth. На зимската школа ќе учествуваат 133 учесници од земјава, Португалија, Германија, Италија, Словенија, Нигерија, Перу, Франција и Јапонија.
Меѓународната школа ќе се организира хибридно – со физичко присуство на Факултетот за електротехника и информациски технологии и онлајн од 14 до 17 февруари 2022. Школата ќе биде фокусирана на следните теми: паметни уреди и технологии, е-здравје; здравство водено од податоци; вештачка интелигенција и машинско учење за здравство; анализа на податоци; паметни уреди и пресметување.
Како дел од школата, ќе се организира и меѓународен натпревар од областа на вештачката интелигенција и машинското учење, во кој што учесниците ќе треба да развијат алгоритам за препознавање на човечки активности со помош на паметни уреди што се носат, како што се паметен телефон и паметен саат. Натпреварот завршува во четврток, на 17.02, кога што ќе биде направена крајната евалуација и најдобрите тимови ќе бидат промовирани и наградени.
За координаторот на проектот, доцент д-р Христијан Ѓорески, школата претставува одлична можност за студентите да се стекнат со знаење од областа на вештачката интелигенција и машинското учење применети во здравството. На школата ќе предаваат реномирани експерти од познати светски научни институции од Велика Британија, Швајцарија, Италија, Португалија и Словенија. Ова е одлична прилика за студентите да развијат вештини за работа со здравствени податоци, да се натпреваруваат, како и да остварат контакти со нивните колеги од странство. Европскиот проект WideHealth дава одлична прилика за подобрување на научно-истражувачки капацитети на ФЕИТ и УКИМ, како и усовршување на голем број млади истражувачи во овие области. Практичната настава и вежбите се поддржани од асистенти и истражувачки кадар од ФЕИТ, но и кадар од другите институции, учесници во проектот.
Еден од водечките партнери во проектот е италијанскиот истражувачки центар FBK (Fodazione Bruno Kessler), кои што се експерти во областа на електронско здравје. Професор д-р Оскар Мајора, раководител на одделот за Дигитално Здравје во FBK, исто така е и водечки експерт во проектот и ќе биде лично присутен на школата со две предавања. Според него, овој проект е одлична можност да се споделат знаењата на темата за електронско здравје, особено да се збогатат знаењата на студентите во овие области, како и нивна обука во спроведување на истражување на оваа тема со поддршка на експерти и истражувачи од тие области.
Повеќе информации за проектот и активностите може да се добијат на интернет страницата https://widehealth.eu
