Автоматика, роботика и системско инженерство (6-АРСИ)

Студиска програма: 6-Автоматика, роботика и системско инженерство (6-АРСИ)

Траење: 1 година

Број на ЕКТС кредити: 60 ЕКТС

Услови за запишување: Завршен прв циклус студии (академски) на сродни студиски програми во земјата и во странство.

Академски назив: Магистер по електротехника и информациски технологии од областа автоматика, роботика и системско инженерство

Целта на студиската програма е да му овозможи на студентот продлабочување и втемелување на теоретски и практични знаења од областа Автоматика, роботика и системско инженерство. Со тоа студентот ќе има поголема флексибилност во инженерската практика и многу широк избор на работни места во сите дисциплини од автоматиката, која има како инфраструктурно исто така и интердисциплинарно значење. Користејќи ги овие знаења, студентите ќе бидат оспособени за креативно мислење, самостојна и тимска работа и за донесување одлуки на сите нивоа на одлучување.

Освен во подрачјата каде се среќава високо интегрирана автоматика, како енергетиката, металургијата, процесната индустрија, преработувачката индустрија, производната индустрија, сообраќајот, производството и обработката на храна, здравството и фармацијата, екологијата и други, со стекнатите компетенции магистрираните студенти имаат можност за работа и во интердисциплинарни подрачја, со што извонредно се раширува кругот на можни вработувања. Исто така, не помалку е важна можноста за работа и во развој, истражување и образование, како и можноста за надградување, доколку се определат за трет циклус на образование.

Истовремено, целта на оваа студиска програма е да се образуваат кадри со професионални компетенции препознатливи во земјата, регионот, во Европската унија и пошироко во светот.