Наменски компјутерски системи (7-НКС)

Студиска програма: 7 – Наменски компјутерски системи (7-НКС)

Траење: 1 година

Број на ЕКТС кредити: 60 ЕКТС

Услови за запишување: Завршен прв циклус на студии (академски) на сродни студиски програми во земјата и во странство.

Академски назив: Магистер по електротехника и информациски технологии од областа наменски компјутерски системи

Наменските и вградливите компјутерски системи претставуваат комбинација на хардвер и софтвер чија цел е да се контролира уред, процес или комплетен систем. Во основа комбинацијата од хардвер и софтвер претставува систем кој е наменски проектиран за одредена апликација, дел од апликација или како дел од поголем систем. Наменските компјутерски системи вклучуваат целосен микропроцесор искористен како модул вметнат во друг поголем систем, уред или машина. Ваквите системи се користат за контрола, помагање или набљудување на работата на целосна „машинерија“, опрема или пак фабрика.

Значењето на наменските компјутерски системи расте континуирано. На пример: во 2010 година постоеле и во практична употреба биле над 16 милијарди вакви уреди во целиот свет, а предвидувањата прогнозираат  дека бројот на овие уреди за само петнаесетина години се очекува да се зголеми на неверојатни 80 милијарди. Со други зборови, за секој жител на планетава би постоеле по множество вакви уреди.

Вториот циклус на студии по Наменски компјутерски системи (НКС) има за цел да образува врвни кадри во делот на проектирање, реализација и примена на комплетни хардверски и софтверски наменски системи во сите можни подрачја на примена. Кадрите што одовде ќе произлезат ќе бидат оспособени рамноправно да се носат на светско ниво со своите колеги, а во опредлени аспекти и да доминираат.

По завршувањето на оваа студиска програма кандидатите ќе се стекнат со следните компетенции и способности:

• да имплементираат проектни техники и за хардвер и за софтвер за наменски компјутерски системи;
• да проектираат и реализираат наменски вградливи компјутерски системи во целина – хардвер и софтвер;
• да проектираат и реализираат наменски софтвер за постојни системи;
• да проектираат и реализираат наменски хардвер за постојни системи;
• да следат и активно да учествуваат и да ги подобруваат актуелните истражувања во ова подрачје;
• да бидат оспособени за вклучување и водење на тимови во актуелни интердисциплинарни и специфични подрачја на примена.