КомпетенцииIII
Студиска програма: 13 – Применета математика (13-ПМА)
Траење: 1 година
Број на ЕКТС кредити: 60 ЕКТС
Услови за запишување: Завршен прв циклус на студии – (академски) на сродни студиски програми во земјата и во странство.
Академски назив: Магистер по применета математика.
Вториот циклус на студии по Применета математика, со своите наставни содржини, како и облиците и методите на настава, ќе им овозможи на студентите стекнување темелни знаења, умеења и вештини од областа на применетата математика.
Кандидатите кои ќе го завршат вториот циклус студии од Применета математика ќе се здобијат со широки познавања од различни области на математиката; ќе бидат оспособени да моделираат реални проблеми, да ги анализираат и оптимизираат математичките модели, да најдат аналитичко и/или нумеричко решение на математичките модели, статистички да обработуваат големи бази на податоци, да прават стохастички симулации, да анализираат и моделираат мрежи, да предвидуваат и проценуваат ризици, итн. Студентите ќе се запознаат со целиот процес на решавање проблеми од реалниот свет: креирање математички модел, негова анализа, решавање со соодветни математички методи и алатки, кои понекогаш е потребно самостојно да ги развијат, па сè до интерпретација и примена на добиените резултати.
Со стекнатите знаења од успешно завршениот втор циклус студии од Применета математика, магистерите лесно ќе се вклучат во одделенијата за истражување и развој во домашни и меѓународни компании од техничките стопански гранки, банките и осигурителните компании, односно во компании од различни подрачја каде математиката се користи како фундаментална алатка. Магистерот ќе може да прави консалтинг во овие компании, да предлага и спроведува иновативни решенија во технолошкиот процес, со што би го намалил ризикот на работење и би ги зголемил приходите во компанијата. Оваа студиска програма создава кадар, кој сите овие сектори го препознаваат како фундаментално важен за нивниот успешен развој.
Исто така, завршените магистри на оваа студиска програма ќе можат да продолжат да се развиваат како истражувачи и научници, но и да се вклучат во едукативниот систем на нашата земја. Магистрите по Применета математика особено може да придонесат во научно-истражувачката и наставната работа на универзитетите, научните институти, истражувачките центри и други институции и успешно да продолжат со студирање на трет циклус студии. Токму искуството говори дека овој степен на студии дел од кандидатите го користи и како основа за понатамошно научно усовршување.
