Податочна наука во електротехника и информациски технологии (21 – ПНЕИТ)

Студиска програма: 21- Податочна наука во електротехника и информациски технологии (21 – ПНЕИТ)

Траење: 1 година Број на ЕКТС кредити: 60 ЕКТС

Услови за запишување: Завршен прв циклус на академски студии и освоени 240 ЕКТС кредити или завршени додипломски студии во траење од најмалку 8 семестри пред воведувањето на ЕКТС на сродни студиски програми во земјата и во странство.

Академски назив: Магистер по електротехника и информациски технологии од областа на податочна наука

Цел на студиската програма:   

Со развојот на современите технологии во подрачјето на компјутерските системи и информациските технологии (ИТ), се јавува голема потреба од солиден инженерски кадар што би учествувал активно во изработување на решенија за напредна анализа на податоци и креирање на интелигентни алгоритми од областа на вештачката и машинската интелигенција, а преку тоа и создавање на додадена вредност врз самите податоци како и откривање на нови знаења скриени токму во тие податоци. Со помош на овие напредни решенија, компаниите носат одлуки базирани на податоци и стануваат поконкурентни и попрофитабилни.

Во студиската програма, покрај неопходните аспекти за развивање и реализација на решенија од областа на податочната наука, ќе бидат опфатени и следните тековно многу актуелни аспекти и подрачја:

• Анализа, дизајн и имплементација на решенија и алгоритми од областа на податочната наука применета во различни области и индустрии;
• Развој и имплементација на решенија и алгоритми од областа на машинско учење и машинска интелигенција;
• Развој и имплементација на решенија и алгоритми од областа на длабоко учење со вештачки невронски мрежи;
• Дистрибуирана обработка на податоци и паралелно процесирање на податоци;
• Обработка на слика и видео со алгоритми од машинска интелигенција;
• Обработка на говор со алгоритми од машинска интелигенција;
• Обработка на текст и природни јазици со алгоритми од машинска интелигенција;
• Познавање и примена на алгоритми за оптимизација.
• Примена на развиените решенија и системи во различни сфери и индустрии.

Потребата од образовани кадри од подрачјето на податочна наука е забележлива во академската и стручната јавност на универзитетите во светот, но е особено изразена во индустријата. Наставната содржина на вториот циклус студии од Податочна наука во електротехника и информациски технологии ќе им овозможи на студентите стекнување на: вештини за напредна анализа на податоци од различни типови (табеларни, мултимедијални – слика, видео, говор, природни јазици, итн.), потоа развивање на паметни и интелигентни системи со помош на алгоритми и пристапи од машинското учење и вештачката интелигенција. Ќе се обработуваат современи и најнови технологии и алгоритми од повеќе области – интелигентни системи, паметни уреди, сензори и сензорски системи, информациски системи, бази на податоци и големи податочни множества, обработка и анализа на податоци, пресметувања и обработка во облак, како и оспособеност за работа во интер-дисциплинарни тимови, врвни на светско ниво.