Компјутерски мрежи – Интернет на нешта (8-КМ-ИНН) – 2023

Студиска програма: 8-Компјутерски мрежи – Интернет на нешта (8-КМ-ИНН)

Траење: 1 година

Број на ЕКТС кредити: 60 ЕКТС

Услови за запишување: Завршен прв циклус на студии (академски) на сродни студиски програми во земјата и во странство.

Академски назив: Магистер по електротехника и информациски технологии од областа компјутерски мрежи – интернет на нешта

Интернет на нештата е една од доминантните мрежни технологии што во последната декада доживува енормен пораст. Според анализите на пазарот и предвидувањата на Boston Consulting Group, прикажани во Форбс, потрошувачката на технолигии, апликации и решенија за Интернет на нештата на глобално ниво, ќе порасне до 250 милијарди евра до 2020-тата година. Ова е несомнен и очигледен показател за подемот и исклучителната важност на овие технологии.

Наставните содржини од студиската програма Компјутерски мрежи-Интернет на нешта (КМ-ИНН) се препознатливи и се застапени на повеќе универзитети во Европа и светот:

• Computer Networking and Communications Programs at Ontario Colleges, Ontario, Canada http://www.ontariocolleges.ca/SearchResults/COMPUTERS-TELECOMMUNICATIONS-COMPUTER-NETWORKING-COMMUNICATIONS/_/N-ljhj
• Computer Science: Internet of Things, Master’s Course, Malmo University, Sweden, https://edu.mah.se/en/Course/DA650A
• Master in Internet of Things, EURECOM, Sophia Antipolis, France, http://www.eurecom.fr/en/teaching/master-science/master-degree-internet-of-things-IoT
• MSc Computer Networks and Networks Design, Middlesex University, London, UK, http://www.mdx.ac.uk/courses/postgraduate/computing_and_it/comp_networks_msc.aspx

Потребата од образовани кадри од подрачјето на Компјутерски мрежи со специјализација во областа за Интернет на нешта е забележлива во академската и стручната јавност на универзитетите во светот, но е особено изразена во индустријата.

Наставната содржина на вториот циклус студии од Компјутерски мрежи – ИНН ќе им овозможи на студентите стекнување на: вештини за анализа, проектирање и имплементација на интелигентни компјутерски мрежи и системи кои ги вклучуваат најновите технологии од повеќе области – компјутерски мрежи, сензори и сензорски системи, информациони системи, бази на податоци и големи податочни множества, обработка и анализа на податоци, пресметувања со високи перформанси, пресметувања во grid и облак, напредни мобилни апликации, веб сервиси, безбедносни аспекти, како и оспособеност за работа во интер-дисциплинарни тимови врвни на светско ниво.

Магистрите по Компјутерски мрежи – Интернет на нешта ќе бидат оспособени за работа во сите сфери на едно модерно автоматизирано и информатичко општество, а пред се во паметните инфраструктури, здравството, транспортот, потрошувачката електроника, мобилни уреди и системи, потоа информатичките и телекомуникациските компании, компаниите кои произведуваат и сервисираат системи за мониторинг, компаниите кои се бават со автоматизирано производство на материјални добра, транспорт и сл. Овој модул создава кадар, кој сите овие сектори го препознаваат како фундаментално важен за нивниот успешен развој.

По завршувањето на оваа студиска програма кандидатите ќе можат:

• Да проектираат компјутерски мрежи и мрежни системи во сите подрачја на нивна примена: компјутерските технологии, медицината, транспортот, мултимедијата, индустријата за игри и забави и слично;
• Да развиваат нови области на примена и да ги усовршуваат постојните;
• Да можат да учествуваат во теоретското моделирање, симулација, развој и примена на системи и процеси во ова подрачје;
• Да можат рамноправно да учествуваат во врвните светски развојни интердисциплинарни тимови од подрачјето.